Nuus Artikels

Die liewe beurtkrag is alweer daagliks deel van ons bestaan.  Ons almal se moed sak in ons skoene elke keer wanneer die huis of kantoor in donkerte gehul word. Almal sug – dis daardie tipe sug wat so diep in die grond val dat hy byna die vloerteëls kraak.  Natuurlik is die Suid-Afrikaners heel voor in die koor wanneer dit kom by grappies maak oor enige nuwe ding, ook met beurtkrag.  So ontvang ek ook ‘n stukkie beurtkrag humor die afgelope week wat eindig met die woorde: “Want Hoekom?” en hierdie woorde laat my gedagtes dwaal in ‘n ander rigting.

 

Is daar ‘n dag in u lewe dat u nie wonder waaroor alles gaan nie ? Hoekom doen ons wat ons doen ? Hoekom staan ons soggens op en doen elke dag al die dinge wat ons doen ?  Die vraag moet eintlik wees: “Doen ek elke dag WAT DIE HERE SE DOEL MET MY BESTAAN is ?”

 

Want Hoekom ?

Kolossense 1:10-11 lees so:  “sodat julle waardiglik voor die Here mag wandel om Hom in alles te behaag en julle in elke goeie werk vrug mag dra en in die kennis van God mag groei, en met alle krag bekragtig word volgens die mag van sy heerlikheid tot alle lydsaamheid en lankmoedigheid met blydskap”

 

Mag ons daaglikse handel en wandel spreek van ‘n lewe saam met Christus sodat dit wat ons doen en spreek, tot Sy eer mag wees.

 

Kom ons neem opnuut weer die besluit om Jesus Christus te eer in elke beweging, besluit en woord waaruit ons daaglikse lewe bestaan.

 

Clemens & Stephanie Mans